Adiviñamos os aprobados nas oposicións ao concello de Pereiro. Sentímolo polos case 500 que botastes a instancia

nomeamento no BOP de Ourense do 24 de xuño de 2014

Xa temos resposta ao noso enigma do 28 de marzo: xa sabemos quen son as agraciadas do proceso selectivo para ser funcionario para toda a vida no Concello de Pereiro de Aguiar!

Dito día depositamos ante Notario o noso “augurio” dos que serían agraciados; e a verdade... acertamos 4 de 5! 

A quinta escapóusenos por pouco. E iso que ía na candidatura do alcalde para as eleccións municipais do 2007!

No Boletín Oficial da Provincia de Ourense de 24 de xuño aparecen os nomes das agraciadas, que podedes cotexar coa nosa predición.

Tal e como nos propuxemos na nosa fundación, pretendemos, no noso tempo libre, sinalar co dedo a inxustiza e o descaro co que se opera na nosa provincia.

acta notarial do 28 de marzo de 2014

Dos 475 opositores inscritos ás devanditas oposicións en Pereiro, queremos dirixirnos a 470. Á maioría silenciosa que ten que aguantar que se rían de nós: É posible que moitos dos que vos presentastes acabedes aprobando algunha oposición, pero , case seguro, será fóra de Ourense. Non seredes os menos preparados, pero sodes os que menos amigos tedes no poder.

Se pensas que se pode facer algo, bótanos unha man e participa!